Mangin libre na lamang ang tuition sang mga luyag nga mangin abogado sa pungsod.
Ini ang posible kun mangin layi na ang Senate bill 1639 ni Senate Majority leader Joel Villanueva nga tuyo amyendahan sang Republic Act No. 7662 ang ‘Legal Education Reform Act of 1993’ agud ipatuman ang ‘Legal Scholarship and Return Service Program (LSRS).
Ginpahayag ni Villanueva nga nagakinahanglan karon sang mas madamo nga public defenders sa pungsod bangud may yara lamang sang 2,500 nga abogado ang Public Attorneys Office (PAO) kag ang kada isa ang nagakapyot sang 5,300 nga kaso kada tuig.
Sandig sa isa ka pagtuon sadtong 2016, may yara lamang sang isa ka abogado ang kada 2,500 ka Pilipino. Mas mataas ini kumparar sa Estados Unidos nga may 1 ka abogado sa kada 248 nga residente, samtang sa Italy may 1 ka abogado kada 260 ka residente kag sa Germany amo ang isa ka abogado sa kada 650 ka residente.
Sa idalum sang hagna, pagahatagan sang libre nga tuition fee kag iban pa ang balayran sa eskwelahan, allowance para sa mga libro, clothing kag uniform allowance, allowance para sa dormitoryo ukon boarding house, transportation allowance, Bar review fees kalakip na diri ang Bar Examination application fees, annual medical kag iban pa.
Nakasaad naman sa hagna nga Obligado man ang mga scholars nga magserbisyo sa sulod sang isa ka tuig sa Public Attorney’s Office ukon PAO kag sa diin man nga government agencies nga may kakulang sang abogado.
Pagahatagan sila sang insakto nga civil service rank, sweldo kag mga benepisyo.*
