Iga-relieve sa puwesto ang lima ka fire marshalls sa Negros Occidental sa tion nga mapamatud-an nga nalakip ang mga ini sa mga nagtambong sang farewell party sa isa ka hotel sa Boracay Island.
Ang ini nga mga fire marshals ang nagikan sa siudad sang Bacolod, Silay, San Carlos kag Cadiz.
Ginapahayag nga ang lima ka fire marshals sa probinsya ang nalakip sa 28 ka mga BFP personnel nga gina-imbestigaran sa karon bangud ginapahayag nag-attend sang party humalin Hunyo 12 tubtob Hunyo 14.
Nagtiner ang mga ini sa isa ka hotel nga kuntani maga-attend sang seminar apang natukiban nga nagpatigayon ang grupo sang “despedida” party” para sa isa pa nila nga kaupod.
Madumduman nga nagmando sang imbestigasyon si Interior Secretary Eduardo Año matapos nagdangat sa iya igdulungog ang report nga isa sa mga nagtambong ang nagpositibo sa COVID-19.
Suno kay Año, iga-relieve sa ila karon position ang mga mapamatud-an nga nag-upod man sa “despedida” party kag ipahamatang sa floating status samtang nagapadayon pa ang imbestigasyon.
Ginpaidalom naman sa quarantine ang lima ka mga opisyal matapos nga magpositibo ang isa ka 26-anyos nga babayi nga BFP Personnel nga nalakip man sa grupo.
Sa kabug-usan yara sa 197 ka mga indibidwal ang ginquarantine, lakip na ang 28 ka BFP personnel, 24 ka staff members sang hotel kun sa diin ang mga ini nagtiner kag ang tinawo sang sakayang pandagat nga ila ginsakyan padulong kag pabalik sa Isla.
