Nag-umpisa na ang hearing sang House Committee on Good Government and Public Accountability kag House Committee on Public Accounts may angut sa anomaly sa pagpanghatag sang una nga tranche sang Social Amelioration Program funds.
Sa atubang sang mga tinawo sang Department of Social Welfare and Development (DSWD), gilayon ang mga ini nga gingisa ni House Speaker Alan Peter Cayetano.
Ginpahayag ni Cayetano, dapat nga madasig lamang ang pagproseso sang mga benepisyaryo kag pagdistribute sang SAP nga dapat magalab-ot lamang sang isa ka semana apang bangud sa malawig kag mabudlay nga proseso nga ginplastar sang DSWD nagdangat sang duha tubtob tatlo ka semana ang distribusyon sang SAP.
Nagduda man ini bangud sang tinalikdan, manami ang koordinasyon sang Kongreso kag DSWD rason nga madasig nga ginpasar sang kapulungan ang Bayanihan to Heal as One Act kag ginhimo man sang mga mamalidha ang mga amendments nga ginakinahanglan agud nga mapadasig ang pagpanghatag sini.
Matapos suno sa iya sang Marso kag pag-umpisa sang Abril, wala na sang maayo nga koordinasyon ang ahensya kundi nag-isahanon nalang ang DSWD kag mas nga ginpamatian sang mga ini ang mga regional directors.
Ginpahayag man sini nga ginbalewala sang DSWD ang advise sang Kamara nga nagresulta sa pagkadelay sang SAP sang duha ka semana kag mas nga nagpabudlay sa mga pumuluyo lakip na sa 4Ps.
Lakip sa mga naeksperyensyahan nga problema sang mga beneficiaries sang SAP ang burukrasya ukon pagpasa-pasa sang ulubrahon, dugang pa ang malaba nga proseso sa pagkuha sang ayuda nga nagdangat sa 30 steps, kulang kag mahinay ang paghatag sang forms, pagdoble sang listahan sang beneficiaries, wala pag-intindihanay sang LGUs kag mga barangay, kakulangan sang maayo nga komunikasyon sa distribusyon kag pila pa ka mga nareport nga korapsyon.
