BACOLOD CITY – Ginkumpirmar ni Police Major Armilyn Vargas, Station Commander sang Bacolod Police Station 3, nga napasaka na ang kaso nga murder sini nga hapon, Pebrero 20 batok kay Josan Destua ang gina-alegar nagpatay sang iya live-in partner sa Purok Makawiwili, Brgy. Banago, siudad sang Bacolod.
Sa Interview sang Radyo Bandera kay Major Vargas, iya ginpahayag nga ginakabig nga suspetsado si Josan sa kamatayon sang iya live-in partner nga si Roselyn matapos nga nagpadulong sa ila talatapan ang pila ka mga saksi nga nagatudlo sa iya nga may kahimuan sa kamatayon sang biktima.
Nagpadulong sa talatapan sang Station 3 kaina sang aga ang tiyo sang biktima, nga si Jumor Destua, agud magapasaka sang kaso bangud nagabyahe pa ang iloy sang biktima gikan sa Zamboanga.
Sa interview naman sang Radyo Bandera kay Josan sa sulod sang custodial facility, hugot sini nga ginpanginwala ang kahilabtanan sa kamatayon sang iya live-in partner.
