BACOLOD CITY – Nakatalana nga igapasaka sang Bacolod City Police Station 5 subong nga Lunes, Pebrero 20 ang kaso nga murder batok sa apat nga mga suspetsado sa pagluthang-patay kay Harold John Suarez, 37-anyos, residente sang J St., Hermilinda Subdivision, Brgy. Mansilingan, Bacolod City sadtong tinalikdan nga Pebrero 17, 2023.
Ang mga suspetsado ang ginkilala sanday Matt John Espoli, Rodzel Gonzales Espoli, Mark Torres, kag si alyas “Kalbo”; lunsay mga tumandok sang Iloilo apang naga-arkila sang balay sa Charito Heights sa Brgy. Granada.
Ginkumpirmar man sa Radyo Bandera sang Station Commander sang Police Station 5 nga si PCpt. Francis Depasucat nga nakita na kahapon, Pebrero 19, 2023 ang salakyan nga Isuzu Highlander nga gingamit bilang getaway vehicle sang mga suspek sa parking area sang O Hotel sa Bacolod City.
Suno kay Depasucat, nakita sang utod sang tag-iya ang salakyan sa parking area sang O Hotel kag gilayon nga nag-report ang mga ini sa Police Station 1 kag ginpahibalo sa talatapan sang Police Station 5.
Dugang pa ni Depasucat, ang salakyan ang ginrentahan lamang sang mga suspek kag ginpanag-iyahan sang amay sang live-in partner sang biktima.
Nagpasalamat naman si Depasucat sa tawo nga nakakita sang amo nga salakyan kun sa diin dako ini nga bulig sa ila ginapatigayon nga imbestigasyon.
Samtang ginpahayag naman ni Depasucat nga wala nila makita ang salakyan nga gingamit sang mga suspek agud makapalagyo bangud naka-park ini sa tago kag pribado nga lugar.
Inaway tuga sa pagpangimon sang biktima sa mga suspek nga kustomer sang iya live-in partner nga isa ka masahista ang ginalantaw sa gihapon nga motibo sang mga suspek sa pagluthang-patay sa biktima.
Sa karon, padayon pa nga ginapangita sang kapulisan ang apat nga mga suspetsado.
