Makahulubog nga ilimnon ang ginatan-aw nga rason sa pagka-lumos patay sang isa ka lalaki nga nagpaligo sa swimming pool sa Sitio Mambucano, Barangay Cabatangan, syudad sang Talisay, Negros Occidental sang Domingo, Enero 15, 2023.
Ginkilala ang biktima nga si Jose Amable, 37-anyos, wala sang asawa kag residente sang Purok Yanzon 1, Barangay Mandalagan sa nasambit nga syudad.
Suno sa upod sang biktima nga si Mark Gumban, naga-inom sila sang makahulubog nga ilimnon samtang nagapaligo sa swimming pool sa nasambit nga lugar.
Matapos ang pila ka minutos, nagtakas si Gumban halin sa swimming pool agud magpreparar sang ila pagkaon, apang sang pagbalik niya didto na nakita nga naga utaw-utaw na si Amable sa tubig.
Nahibaluan niya nga wala na sang animo si Amable rason nga ginhingagaw ini dala sa Teresita Lopez Jalandoni Provincial Hospital apang gindeklarar ang biktima nga dead on arrival sang attending physician nga si Dr. Jane Borromeo.
Suno sa katapo sang Talisay PNP, wala sila sang nakita nga foul play bangud wala naman sang mga pilas sa lawas ang biktima.
Nagguwa sa ila imbestigasyon nga bangud yara sa impluwensya sang makahulubog nga ilimnon kag nagapangluya na ang lawas sang biktima, napaslawan ini nga makabutwa sa tubig nga gintunaan sang iya kamatayon.*
