Wala sang ayuda nga ihatag ang gobyerno apisar sang mas istrikto nga quarantine measures sa pila ka mga area sa pungsod bangud sa nagasaka nga kaso sang Covid-19.
Suno sa Malakanyang, wala sang multibillion-peso package nga ihatag sa mga residente nga yara sa GCQ bubble kaangay sang gintalana sang gobyerno sang naglockdown nagligad tuig bangud mahimo pa man makagwa ang mga tawo kag magtrabaho.
Nagabalaka naman ang pila ka mga sektor tungod sa mas istrikto nga safety measures bangud suno sa ila posible naman ini nga magdisrupt sa mga negosyo.
Kahapon nagpangayo sang cash assistance ang mga labor groups nga Associated Labor Union (ALU), Partido ng Manggagawa (PM) kag Kilusang Mayo Uno (KMU) sang ginsuspendir sang gobyerno ang mga operasyon sang pila ka mga non-essential industries kag nagpatuman sang movement restrictions sa Metro Manila, Bulacan, Cavite, Laguna kag Rizal agud matapna ang nagasaka nga kaso sang Covid-19 infections.
Nagpanawagan naman sa Kongreso si PM chair Renato Magtubo nga ipasar na ang ginaproponer nga Bayanihan 3.
Suno sa iya, responsibilidad sang gobyerno ang maghatag sang cash assistance sa mga trabahante.Apang suno naman kay presidential spokesman Harry Roque, padayon man nga nagabulig ang gobyerno sa mga displaced workers kag mga magagmay nga negosyo.
