Pahayag ni Police Major Junji Liba, tagapamuno sang Bacolod Traffic Authority Office (BTAO) nga madugay na sini gina-remind ang iya mga enforcers nga sawayon kag tutokan ang mga motorista nga may gina -angkas nga mga kabataan nga indi makalab-ot sa foot rest sang motor, indi makahakos sa drayber kag wala sang helmet.
Apang suno kay PMaj. Liba nga indi man makapanakop ang mga local nga enforcers ilabi na nga ini ang obra na sang mga taga Land Transportation Office bangud isa ini ka layi nasyunal nga amo ang Republic Act 10666 nga nagadumili sa mga minors nga magsakay sa atubang sang mga motorcycle drivers.
Angut man sini, pabor naman si PMaj. Liba sa ginhambal sadto ni Mayor Albee Benitez nga istriktuhon ang pagpanakop sa mga drayber ka mga motor nga naga-angkas sa mga naga edad 7-anyos panubo. Bangud isa man ini ka tikang agud ma hagan-hagan ang aksidente sa dalan.
Ginahulat man sini nga magdagdag si Mayor Albee sang city ordinance agud may yara sila sang jurisdiction mangdakop bangud pagsaway gid lamang ang ila karon nga mahimo.
Sa penalidad, pwede lang sila ka butang sang charges sa iban nga pamaagi parehas sang pagcharge sa indi insakto nga pagsukok sang helmet sa mga kabataan bangud masami ang ginagamit amo ang helmet nga iya ka bike kag indi ini pwede bangud wala ini nakapaidalom sa quality control.
Gani panugyan sang hepe sa mga motorista nga magsunod sa layi sang trapiko kag indi na magpasaway agud makalikaw sa aksidente.*
