Plano karon sang siudad sang Bacolod nga panakpon ang mga dalagko nga truck nga nagabaligya sa higad sang dalan nga wala sang nagakaigo nga permit, suno kay Councilor Al Victor Espino, Chairman sang Committee on Transportation and Traffic.
Sa ginpatigayon nga regular session sang Sangguniang Panlungsod kagapon nga adlaw, Abril 19, nagduso ang konsehal nga i-ammend ang City Ordinance number 09-17-818 ukon “An Ordinance Establishing the Tow-Away Zones in the Various Streets of the City, Allowing the Impounding of Vehicles through the issuance of impounding receipts and Providing Necessary fees and Penalties for Violations thereof.”
Sa pag-amendyar sang nasambit nga ordinansa, mas pabaskugon sang konseho ang probisyon sa Towing kag Impounding sang salakyan nga yara sa illegal parking spot kag pagpapanaog sang mataas nga penalidad sa mga nagalapas sang ordinansa sang Bacolod agud mangin matawhay ang dalanon sa siudad kag madisiplina ang pumuluyo.
Sandig sa Bacolod City Ordinance 09-17-818 magabayad ang violator sang P300 sa wheel clamp nga igabutang ka siudad sa sedan type nga salakyan, P400 sa medium size kag P500 sa heavy size nga salakyan kag sa towing magabayad ang naglapas nga driver sang P1,000 sa light size, P1,200 sa medium size kag sa heavy P1,400.
Samtang sa Illegal parking may penalidad nga P800 nga bayran ang naglapas sang kasuguan, illegal nga pagkakas sang Wheel Clamp P4,000 samtang sa Colorum nga operasyon sa 4-wheel nga salakyan P5,000 nga penalidad kag sa motorsiklo P2,000.
Sa impounding ka salakyan sa 1st offense P150 per day sa 1 tubtob 3 ka bulan, 2nd offense P300 per day sa 3 tubtob 4 ka-bulan kag 3rd offense P450 per day sa 5 tubtob 6 ka bulan.
Nahibaluan nga may report nga may mga dalagko nga mga Wing Van Truck nga naga-parking sa higad sang dalan para magbaligya sang mga saging nga gikan pa sa Mindanao nga wala sang permit kag nagahatag sang problema trapiko sa siudad.
Dugang pa sang konsehal nga nagareklamo ang mga lehitimo nga vendors sa Bacolod bangud sila ang naga-kompetensya sa ila mga baligya kag wala sang nagakaigo nga permit kag padayon nga nagabaligya sang saging kag iban pa nga mga prutas nga malapit sa ila ginabaligyaan man.
Sang malab-ot sang Radyo Bandera ang isa sa nagabaligya sang saging karga sa ila ginadala nga win van, may ara sila sang DTI permit apang wala sang Business Permit gikan sa syudad, pero kay nag-istrikto ang siudad sila ang dapat nga magasunod sa mando sang Bacolod LGU angut sa Business Permit.*
