Ginbawian sang kabuhi ang senior citizen nga enkargada matapos ini nga gin-hold up kag ginluthang sa Hacienda Hopia, Barangay 12, siudad sang Victorias, takna las 3:30 sang hapon, Domingo, Oktubre 8, 2023.
Ginkilala ang biktima nga si Nerisa Cardinal, 67-anyos, balo kag residente sang Hacienda Magdalena, Barangay 8, Victorias City.
Suno kay Victorias City PNP Deputy Chief PMajor Joy Ellaga, nagguwa sa ila imbestigasyon nga nagsakay ang biktima sa depasahero nga tricycle agud magpauli sa iya nga balay.
Sang nakalab-ot na ang tricycle sa circumferential road sa Barangay 12, hinali na lamang sila nga ginbalabagan sang mga suspek sakay sang motorsiklo
Ginpapanaog sang mga suspetsado ang biktima sa tricycle kag hinali na lamang ini nga ginluthang nga gintunaan sang iya nga kamatayon.
Dugang pa ni Ellaga nga ginkuha man sang mga suspetsado ang bag sang biktima antes magpalagyo matapos ang kremin.
Base sa mga pasahero nga upod sang biktima, indi klaro ang nawong sang mga suspetsado bangud nakasuksok ang mga ini sang bonet.
Padayon naman ang imbestigasyon sang kapulisan agud mahibaluan ang identity sang mga suspetsado kag kun robbery man gid ang natabo bangud ang biktima lamang ang ginpapanaog sa tricycle kag ginluthang.