Patay ang isa ka mangunguma matapos ginluthang sang apat ka wala makilal-an nga suspetsado sa Hacienda Malinao, Barangay E-Lopez, Silay City, sadtong Biyernes nga adlaw.Ginkilala ang biktima kay Arnold Rivera, 48 anyos kag residente sang nasambit nga lugar.
Base sa interview sang Radyo Bandera kay Silay City PNP Deputy Chief of Police for Administration, Police Lt. Gilmore Cuare, papauli na ang biktima sakay sa iya rusi nga motorsiklo angkas ang iya asawa sang sila ang ginpaparahan sang 2 ka suspek sakay sang puti nga sedan nga salakyan kag may upod man nga 2 ka suspek sakay sang motorsiklo.Ila nga ginpapanaug ang asawa kag ginluthang ang biktima gamit ang ginapahayag 5.56 m16 rifle nga nag-igo sa li-og kag idalom nga bahin sang ulo sang biktima.Ginahulat pa sa karon ang post mortem result sang bangkay sang biktima agud makumpirmar kung diin pagid ang iban nga igo sa lawas sini.
Nakita sa crime scene ang 2 ka fired cartridge sang 5.56 m16 rifle kag 1 ka live ammunition sang caliber .45.Samtang, naguwa naman sa record sang kapulisan nga nakaagi na isyuhan sang search warrant ang biktima sa kaso nga paglapas sa layi nga nagadumili sa paghupot sang iligal nga armas kag may theft case ini sa Himamaylan.
Dugang pa, nga gina-alegar posible malapit man nga pamilya sang epogon ang biktima nga na-link sa epogon robbery hold-up group apang gina-check pa sa karon sang kapulisan antes ini makumpirmar.
Desidido naman magpasaka sang kaso ang pamilya sang biktima batok sa mga suspetsado.
Padayon man nga nagapagpakig-angot ang kapulisan sa asawa sang biktima sa posible lead kag kong ano ang madalom nga motibo sa pagluthang-patay sa biktima.
via Jinn A. Siatita
