LA CARLOTA CITY – Suno kay PLTCOL Lowell Garinganao, hepe sang La Carlota City Police Station, wala naigo ang 65-anyos nga mangunguma nga gina-alegar nakilatan sa Hacienda San Miguel, Brgy. San Miguel, sa nasambit nga siudad sang Martes, Enero 17.
Ginklaro ni PLTCOL Garinganao nga “cardiac arrest” ang gintunaan sang kamatayon sang biktima kag wala sang may nakita nga sunog ukon pilas sa iya lawas sang gin-usisa sang doktor.
Ginalantaw nga posible nakibot ini sang nagdaguob, rason kun ngaa gilayon ini nga natumba sa duta.
Madumduman nga takna las dos sang hapon sang magluntad ang insidente, pagkatapos sang pagpananom sang patdan ang mga mangunguma, lakip ang biktima nga ginkilala kay Elizabeth Arevalo, 65-anyos, may bana, kag residente sang Purok Santan sa nasambit nga barangay.
Magapauli na kuntani ang mga mangunguma sang hinali nga nag-ulan kag nagpangilat.
Gilayon naman nga gindala ang biktima sa Don Salvador Benedicto Memorial District Hospital apang gindeklarar ini nga patay las-2:45 sang hapon.
Nagalaum si PLTCOL Garinganao nga pagabuligan ang biktima sang hacienda kun diin ini anay nagatrabaho.
