Isa ka makatalandog nga istorya ang ginpakigbahin sang isa ka call center agent nga si Bea nga anay nagabaligya sang balinghoy kag kakanin.
Suno kay Bea, estudyante pa lang siya sadto sang nagbaligya siya sang mga kakanin kag balinghoy.
Ini ang nangin pamaagi ni Bea agud mabuligan ang iya nga pamilya kag masuportahan man ang iya nga pag-eskwela.
Sang nakatapos sa pag-eskwela si Bea, nagpadulong ini sa Luzon agud mag-apply bilang call center agent kag suno sa iya indi nangin mahapos ang iya nga paghanas bangud sa masami ini makabaton sang malain nga mga tinaga batuk sa iya.
Apang nagpursige si Bea tubtob nga mangin regular sa iya nga trabaho kag nagapasalamat ini sa iya kompanya bangud sa paghatag sa iya sang oportunidad nga mahatagan niya sang manami nga pangabuhi ang iya nga pamilya.
Sa karun, isa na ka tuig si Bea bilang call center agent kag nagabulig ini ipatukod ang balay para sa iya mga ginikanan.
