Nakaangkon sang madamu nga pilas sa iya lawas, tuga sang pagbuno, ang 26 anyos nga manunudlo sa probinsya sang Batangas kag nabawian sang kabuhi.
Nag check in ang manunudlo nga gintumod sa report bilang homosexual, sa isa ka motel sang tinalikdan nga Domingo, las 6:40 sang gab-i, kaupod ang iya karelasyon nga lalaki, nga naga-edad sang 31 anyos.
Las 8:30 sang gab-i, nakabati sang gahod ang mga staff sang hotel, gani nagpadulong sa kuwarto sang biktima kag suspek ang mga empleyado.
Puno sang dugo ang lawas sang biktima, bangud sang madamu nga mga pilas sa iya lawas, sang makit-an sang mga trabahador sa motel.
May indikasyon man nga nagbatu ang biktima , bangud sang pilas nga nakit-an sa lawas sang suspetsado.
Nagtuyo pa ang suspek nga magpalagyo, apang nadakpan sa lugar nga may kalayuon nga 40 metros gikan sa eksena sang kremin.
Duha na ka tuig nga magkarelasyon ang biktima kag suspek , suno sa mga otoridad.
Narekober sa gwa sang kuarto ang ¬Mitsubishi Strada nga salakyan sang biktima, samtang nakuha naman sa sulod sang kuarto ang isa ka unit sang iPhone, relo, calculator, 2 ka gold necklace, isa ka gold bracelet, duha ka wallet nga may unod nga mga IDs, duha ka notebook, isa ka itom nga bag kag ang kuarta nga nagabalor sa 22,000 pesos.
