Isa ka mabuot, maalwan kag ginakabig dalangpan sang mga residente sang First District si Mariano Antonio ‘Marton’ Cui, Negros Occidental Provincial consultant for Hospital operations bangod sa iya pagka-mabinuligon sa tawo.
Suno sa panaysayon ni Rolando Andutan, owner sang Sanca Security and General Manager nga may duwa ka igo sang bala sang wala pa matumod nga armas-luthang ang Land Rover nga salakyan ni Cui sa bahin sang driver seat.
Base naman sa obserbasyon ni Andutan nga 35 tubtob 40 ka metros ang kalayoon gikan sa salakyan ni Cui kag sang nagtiro sa iya nga posible “sniper” ang gingamit.
“Kung basehan ang distansya, kung wala ka training sa pagtiro, indi kagid maka-igo eh. Dugangan pagid kung may telescope ka,” palayag ni Andutan.
Base naman sa inisyal nga impormasyon suno kay Andutan nga alas 4:00 kahapon palang sang hapon, naga-park na ang gina-alegar salakyan sang nagtiro kag nagbutang pa sang Early Warning Device sa diin, gin “force” nga ginpa-abante ang salakyan.
Dugang pa ni Andutan nga antes pa man natabo ang insidente, may mga pamahog na sa kabuhi ni Cui apang ginabalewala niya lang ini bangod ginapaminsar niya nga mabo-ot siya kag wala sang kontra.
Ang katapusan nga pagkitaay ni Andutan kag Cui alas 9:00 kahapon sang aga sa diin, gincongratulate pa ni Cui si Andutan matapos ini nagnegatibo sa COVID-19.
