BACOLOD CITY– Nagdangat sa masobra sa 94 milyones ka pesos ang balor sang iligal nga druga nga nakumpiskar sang Bacolod City Police Office humalin sa bulan sang Enero tubtob Disyembre sang tinalikdan nga tuig.
Base sa rekord, naglambot sa 13, 890.44 grams sang shabu ang nakumpiskar nga may kabug-usan nga balor nga nagdangat sa Php94, 454, 992.
Ini ang resulta sa 511 ka police operations nga ginpatigayon sa diin nagdangat naman sa 594 ka mga drug personalities ang nagkaladakpan.
Sa nasambit nga numero, 38 diri ang ginakabig nga High Value Individuals (HVI), 538 ang Street Level Individuals (SLI), anum ang menor de edad samtang ang iban ang ginakabig naman nga mga newly identified drug personalities.
Kabug-usan naman nga 811 ka mga kaso ang napasaka sa korte sa paglapas sa nagkalain-lain nga section sang RA 9165.
Gin-commend naman ni BCPO Director Police Colonel Thomas Joseph Martir ang mga katapo sang BCPO sa ila accomplishments nga nalab-ot sang tinalikdan nga tuig.
Suno sa City Director nagapakita lamang ini nga nangin madinalag-on ang ila kampanya nga mahagan-hagan ang nagaluntad nga kriminalidad sa siudad.*