Silay City, Negros Occidental—Naglab-ot sa masobra P21 milyones nga balor sang shabu ang nakumpiskar sang Silay City Police Station sa ginpatigayon nga buy-bust operation sa ciudad sang Silay sang Domingo nga adlaw Agosto 28.
Una nga nadakpan ang mag-ulutod nga sanday Angie kag Angielyn Dumdumaya pinaagi sa Police Poseur-Buyer kabaylo sang P30,000 nga bili sang duha ka heat-sealed transparent plastic sachets sang suspected shabu.
Nakuhaan ang mga ini sang P13,668,000 nga balor sang shabu nga may kabug-aton nga 2,010 gramos sa Sitio Dapdap, Barangay Lantad sa syudad sang Silay las 10:05 sang aga.
Samtang, isa naman ka High-Value Individual (HVI) nga ginkilala kay Mark Villaran y Aguilar alyas “Maco” ang nakuhaan sang P7,561,600 nga balor sang shabu sa Entrance sang Mallery 2 Subdivision, Barangay Rizal, ciudad sang Silay, Negros Occidental las 9:45 sang gab-i.
Nadakpan ang suspetsado sa gin kasar nga buy-bust operation sa diin, iya na baligyaan sang apat ka pakete sang ginasuspetsahan shabu ang Police Poseur Buyer kabaylo sang P48,000.
Kapin sa 1,112 gramos ang kabug-aton sang shabu nga nakuha kay Villaran.
