BACOLOD CITY – Nagdangat na sa 18,236 ang mga bakwit sa asud-asud nga engkwentro sa syudad sang Himamaylan, Negros Occidental humalin nagligad nga semana, base sa report sang Provincial Social Welfare Development Office.
As of 12 noon sini nga Miyerkules, Oktubre 12, may sumatotal 3,795 ka mga pamilya ukon 18,236 ka mga indibidwal ang apektado sang armed conflict sa tunga sang 94th Infantry Battalion sang Philippine Army kag katapo sang New People’s Army.
Tatlo ka mga barangay sa Himamaylan ang apektado sang kinagamo. Ini amo ang Carabalan, Cabadiangan kag Barangay III.
May 18 tanan ka mga evacuation centers ang ginpatukod agud temporaryo nga tiniran sang mga bakwit.
Nagkalain-lain nga food items ang ginpanghatag naman sang probinsya sa mga apektado nga pumuluyo, suno sa report ni Provincial Social Welfare Officer Merle Garcia kay Negros Occidental Gov. Eugenio Jose Lacson.
Nalakip sa ayuda nga napanghatag na amo ang 10 ka sako nga bugas, 240 family food packs, 5 boxes sang fortified meal nga naga-unod sang 32 ka packs kada box, 10 ka boxes sang corned beef, 10 boxes sang beef loaf kag 5 boxes ukon 240 ka cups sang arroz caldo.*
