Bangud sa nagasaka nga kaso sang COVID-19 sa pungsod, nagpagwa sang Memorandum Circular ang Department of Interior and Local Government nga nagadumili sa pagpatigayon sang mga super spreader events ilabi na sa mga barangays.
Ang mga Punong Barangays ang gintagaan sang obligasyon sang DILG agud bantayan ang mga pumuluyo nga nagahiwat sang mga social gatherings.
Suno sa head sang DILG Bacolod nga si Ma. Joy Marideth Madayag, pagasakaan sang kaso ang mga opisyales sang barangay nga mapamatud-an nga nagalapas sa pagpatuman sang MPHS ukon Minimum Public Health Standards.
Dugang pa sini, ginadumilian ang pagpatuman sang mga social gatherings parehas sang piyesta, bulang kag iban pa.
Suno pa kay Madayag, wala pa ini may nabaton nga reklamo angut sa mga barangay officials nga naglapas sang MPHS.
Sa ulihi, ginpaathag ni Madayag nga dako ang bahin sang mga Punong Barangay ilabi na sa kampanya kontra COVID-19.
Nagahingyu naman ini sa publiko nga kun pwede limitahan kag dumilian anay ang mga social gatherings.
