Nagpanawagan si vice presidential candidate Senator Kiko Pangilinan sa gobyerno nga hatagan sang gilayon nga ayuda ang mga sektor nga direkta nga apektado sang pagsaka sang presyo sang gatong kag mga naapektuhan sang kalamidad agud maseguro ang ila nga pangabuhian.
Ini kasunod sang panibag-o nga bigtime hike sa presyo sang diesel kag gasolina nga nagdangat na sa balor nga P1.50 kag P1.80 kada litro.
Ini na ang ikawalo nga semana sang pagtaas sang presyo sang gatong. Sa amo nga tion, nagsaka ang presyo sang diesel sa P8.65 kada litro samtang P7.20 kada litro sang gasolina.
Sumugod sang pag-umpisa sang tuig, yara na sa P18 ang gintaas sang presyo sang diesel samtang P19.70 naman sa gasolina.
Para sa mga nagamaneho sang pampubliko nga salakyan, ginsiling ni Pangilinan nga posible nga maghatag ang gobyerno sang subsidiya sa gatong ukon cash ayuda bilang bulig.
Pagahatagan man sang Department of Agriculture (DA) sang gilayon nga bulig ang mga mangunguma kag mangingisda nga naapektuhan sang mga nagliligad nga kalamidad.
Suno kay Pangilinan, dugang ini nga problema para sa mga Pilipino bangud magasaka man ang presyo sang balaklon.
