Promoted na ang mixed martial artist nga si Kevin Belingon ukon mas kilala bilang “The Silencer” matapos makabaton sang blue belt sa Brazilian jiu-jitsu.
Ang 35-anyos nga tumandok sang Kiangan, Ifugao ang gin-promote ni Prof. Gibran Langbayan, nga ginkilala bilang una nga black belter sa Cordillera Region.
Ginpasidunggan ni Langbayan si Belingon sa Maharlika Martial Arts Center sa Baguio City sadtong Abril 10.
Ang anay ONE bantamweight world champion ang nagsugod training sang jiu-jitsu sadtong 2007.
Madamo na sang may naatubang si Belingon, lakip na sanday Masakazu Imanari, Masakatsu Ueda, Toni Tauru, Reece McLaren kag Bibiano Fernandes.
Sadtong Disyembre 2022, nagsulod si Belingon sa klase ni Langbayan agud mapanami pa gid ang iya performance sa sulod sang MMA arena.
Humalin sa white nangin blue belter na ang atleta sa sulod sang apat lamang ka bulan.
Ulihi nga nakita si Belingon nga naghampang sadtong Nobyembre, 2022 batok kay South Korean hard-hitter nga si Kim Jae Woong.
Nagaplano naman ini nga magabalik sa MMA arena sini nga tuig.*
