Pilason ang duha ka persona matapos magbungguanay ang motorsiklo kag awto sa may bahin sang Stop Oso sa siudad sang Cadiz, takna las 7:30 sang aga, Lunes, Setyembre 25, 2023.
Base sa impormasyon sa Cadiz City Police Station, halin sa Cadiz padulong sa Sagay si Ernie Vic Dela Cruz y Namia sang ginamaneho sini ang iya Hyundai Accent nga awto.
Samtang, ginamaneho naman sang 16-anyos ang motorsiklo kag angkas sini si Sherly Montero y Paglinawan, 64-anyos, lunsay mga residente sang Brgy. Burgos sa siudad sang Cadiz.
Sang makalab-ot na ang duha ka salakyan sa nasambit nga dalan, hinali na lamang nga nagbungguanay ang motorsiklo kag awto.
Bangud sa mabaskog nga impact, nagtabog ang duha ka sakay sang motorsiklo sa sementado nga karsada kag nakaangkon sang mga pilas sa lawas.
Gilayon naman gindala sa Cadiz City district hospital ang mga nasamaran agud mahatagan sang medikal nga atensyon.*
