Motorcycle VS Pickup kag Ambulance VS Truck.
Isa patay kag duha ang nakaangkon sang injuries sa nagluntad nga duha ka aksidente sa Calumanggan, syudad sang Bago, Negros Occidental, sini nga Miyerkules sang gab-i, Nobyembre 30, 2022.
Una nga nagbungguanay ang isa ka Suzuki Raider 150 nga motorsiklo kag Mitsubishi Strada nga pickup takna las 6:30 sang gab-i, Miyerkules.
Sang mag-responde na ang rescue ambulance sang Bago City Disaster Risk Reduction Management Office, nakabunggo ini sa truck nga may karga nga tubo, mga takna las 6:43 sang gab-i.
Base sa inisyal nga impormasyon nga nakuha sang Radyo Bandera Bacolod, yara sa fast lane ang truck sang nakabunggo ang ambulance diri, magluwas pa nga na-trigger na ang traffic sa lugar bangud sang kadamuon sang bystanders kag nagadulog nga salakyan agud mang-usyuso.
Gindala ang lalaki nga drayber sang motorsiklo sa Bago City District Hospital apang ini ang gindeklarar nga dead on arrival, base sa report nga nabaton sang Bago CDRRMO Operations Center.
Ang pilason niya nga angkas nga babayi ang nakaangkon sang head injury apang conscious man.
Samtang, ang drayber naman sang rescue ambulance ang wala maano. Ang onboard nga nurse ang nalipungan apang naka-recover man. Ang isa pa gid ka onboard nga search and rescue personnel ang igapaidalum naman sa X-ray sa Bacolod South Hospital.*
