Ginbawian sang kabuhi ang 43-anyos nga rider matapos mabungguan sang truck sa Barangay Castellano, banwa sang Calatrava, Negros Occidental takna las 11:30 sang aga, Miyerkules, Oktubre 18, 2023.
Ginkilala ang biktima kay Ruel Flora y Natad, rider sang motorsiklo kag residente sang Sitio Antubayan, Barangay Castellano, banwa sang Calatrava.
Samtang, ginkilala naman ang suspek kay Armando Alinicado y Lumocso, 42-anyos, driver sang truck kag residente sang Barangay Andres Bonifacio, siudad sang Sagay.
Base sa report sang Calatrava Municipal Police Station, nagabiyahe sa pareho nga lane ang duha ka salakyan samtang nagapadulong sa Barangay Castellano sa nasambit nga banwa.
Sang hinali na lamang nadulaan sang kontrol sa pagmaneho ang driver sang truck kag nabungguan sini ang ginasundan nga motorsiklo nga ginamaneho sang biktima.
Bangud sa mabaskog nga impact, nakaangkon ang biktima sang patal nga mga pilas sa nagkalain-lain nga bahin sang iya lawas.
Gindala sa Calatrava Municipal Hospital ang biktima apang gindeklarar ini nga dead-on-arrival sang attending physician.*
