Ginpanginwala ni Bacolod City Councilor Al Espino nga ginpahog niya ang building guard sang Bacolod Traffic Authority Office sa compound sang Bacolod City Police Office takna las 5 sang hapon, Miyerkules, Oktubre 18.
Sa interview sang Radyo Bandera kay Espino, iya ginbuyagyag nga samtang ginaproseso sang estudyante ang pagkuha sang na-impound nga motorsiklo, may nagpalapit diri nga isa ka lalaki nga nakasuksok sang BTAO uniform kag nagtanyag nga iya i-clear ang motorsiklo kabaylo sang P1,500.
Suno kay Espino nga nagsalig ang estudyante kag wala ini nagduha-duha nga magbayad sang P1,500 sa lalaki bangud ini ang nakasuksok sang uniporme sang BTAO.
Gindala na sang estudyante ang na-impound nga motorsiklo nga mahapos lang i-operate bangud finger print lamang ang kinahanglan diri agud mag-andar.
Matapos nga mahibaluan ini sang BTAO, gintawgan kag ginpabalik ang estudyante sa opisina kag gina-alegar nga ginpahog nga pagasakaan sang kaso nga carnapping.
Sang nagbalik ang estudyante sa BTAO dala ang motorsiklo, gin-detain ini kag ginpangayuan pa sang kwarta bangud wala ini sang nagakaigo nga dokumento nga pwede na i-release ang motorsiklo.
Dugang pa ni Espino nga gintawgan siya sang tiya sang estudyante kag ginpahibalo ang natabo.
Didto na nangakig si Espino bangud ginaunsinte lang sang BTAO ang korapsyon nga ginahimo sang ila personnel rason nga nagkadto ini sa BTAO agud istoryahon si BTAO head Major Junji Liba agud diskusyunan ang insidente.
Ginpanginwala naman ni Espino nga ginpahog kag ginpakitaan sang armas-luthang ang building administrator nga si Abner Salvallon nga nagbalabag sa iya magsulod sa opisina ni Liba.
Pahayag pa sang konsehal nga wala siya nahadlok sa kaso nga ipasaka sang BTAO batuk sa iya bangud nagahambal lamang ini sang matuod.*
