Sa atubang sang madamo nga tawo, ginluthang-patay sa sulod sang isa ka bulangan sa Sorsogon City ang isa ka lalaki nga gina-alegar anay rebelde kag nagbalik sa sabak sang gobyerno.
Base sa report sang GMA News, makita sa CCTV footage sa sulod sang Guinlajon Cockpit Coliseum sa Barangay Guinlajon, West District, ang biktima nga nagalakat.
Matapos ang pila ka minutos, duha ka lalaki ang nagsunod sa iya kag gilayon ini nga ginluthang sa likod sang iya ulo.
Sang natumba na ang biktima, liwat ini nga ginluthang sang madamo nga beses antes magpalagyo ang mga suspetsado.
Suno kay Police Captain Estrella Recto, PCR Officer, Sorsogon PPO, nga gin-ako sang rebelde nga grupo nga Celso Minguez Command ang krimen.
Sandig sa ginpaguwa nga pahayag sang mga rebelede, anay miembro nila ang biktima nga ila ginbalusan bangud sa pagbalik sini sa sabak sang gobyerno.
Ginapangita na sang mga otoridad ang mga suspetsado.*
