Malapit tunga sa milyon na ka mga indibidwal ang nakaparehistro sa BacTrac Contact Tracing App sang Bacolod nga ginagamit agud mas madasig ang pagpatigayon sang contact-tracing sa mga close contact sang COVID-19 patients.
Ss of May 3, may yara naman sang 9,597 ka mga establisyimento ang naka-register kag naga implementar sang BacTrac system kag ila gina-scan ang mga QR code sang mga naga sulod sa tagsa ka building agud mas mahapos man sa Emergency Operations Center nga mag tsekyar kon sanday sin-o ang naka sulod sa nasambit nga mga hulot, panaglitan may yara sang nagpositibo kag kon sanday sin-o ang naka dungan sini.
Samtang, may yara na sang 78,730 nga mga residente sang Bacolod nga napang swab.
Base sa record sang Department of Health Region 6, may yara na sang 1,035 active cases sa Bacolod.
Ginsiling ni Vice Mayor Elcid Familiaran chairman sang Bacolod IATF nga 1 na ka tuig nga naga away ang ciudad sa sining pandemic kag indi na pareho sang una nga wala pa nakabalo kun paano awayon ang virus.
Suno kay Familiaran, nakabalo naman ang mga pumuluyo kun paano malikawan nga malatnan sang balatian kag dapat mangin responsable na sa ila tagsa-tagsa ka kaugalingon.
Indi naman kinahanglan pa nga i-escalate ang quarantine status siling man sang bise-alkalde bangud ginalantaw man sang national government ang economic stability sang ciudad nga hardly-hit man sang pandemic.*
