Ginakabig nga “blessing” sang mag-asawa nga Jocelyn kag Florencio Artus ang ila ika-tatlo nga bata nga si Cadet First Class Janrey Cabanero Artus matapos nagradwar nga Summa Cum Laude kag Class Valedictorian sa Philippine Military Academy Masaligan Class of 2021.
Suno kay Jocelyn, iloy ni Janrey nga isa ka retired Master Teacher II, sadto pa man sang naga-eskwela sa elementary kag high school ang iya nga bata, nakitaan na ini sang tumalagsahon nga kaalam.
Ginsiling pa sang iloy nga “gifted” nga sahi sang bata si Janrey bangud sa bisan diin nga anggulo sang iya nga pagtuon, masami ini nga naga-excel.
Nagkuha sang kurso sa University of the Philippines-Visayas nga Chemical Engineering si Artus kag duha na lamang kuntani kabulan magatapos ini bilang Summa Cum Laude, apang nagdesisyon ini nga magsulod sa PMA matapos nga makapasar sa exam.
Suno naman sa amay sini nga si Florencio nga isa ka retired Army, wala niya gin-engganyo si Janrey nga magsulod sa military bangud nahibaluan na niya ang kabudlayan sang mangin trabaho sini.
Sang yara na sa sulod sang akademya, nangin consistent Dean’s Lister kag Commandant’s Lister si Artus.
Nangin kabahin man ini sa pag-revise sa Honor Code kag System Handbook and Pamphlet sang akademya subong man ang pagdihon sang online CCAFP Disposition Form.
Sa edad nga 25 madamo na sang mga award ang nalab-ot ni Artus kaangay na lamang sa mga pasidungog nga iya nakuha sa iya nga graduation:
-Presidential Saber
-Philippine Navy Saber
-Australian Defense Award
-Spanish Armed Forces Award
-General Antonio Luna Award
-Academic Group Award
-Jusmag Award
-Humanities Plaque
-Department Of Leadership Plaque
-Mathematics Plaque
-Computing & Information Sciences Plaque
-Management Plaque
-Natural Sciences Plaque
-Social Sciences Plaque
-Navy Professional Plaque
Ginsiling man sang iloy, nga wala gid ginpaslaw ni Janrey ang ila hinyo sang magsulod ini sa academy nga hatagan sang dungog ang banwa sang San Enrique.
Tuman naman ka malipayon ang mag-asawa sa nalab-ot sang ila bata kag nagapangamuyo ang mga ini nga magpabilin nga masinulundon, mabuot kag mapainubuson ang ila anak.
Si Artus ang natalana nga magsulod sa Philippine Navy.
Nagpalab-ot naman sang iya nga pagpanginbulahan si Negros Occidental Governor Eugenio Jose Bong Lacson para sa nagpangibabaw nga Negrense.*
