Ginbulgar sang babaye nga ginakabig “special child”, ang ginhimo sa iya nga pagpang abuso sang singer nga si Nick Carter sang Backstreet Boys.
Suno sa biktima, ginpasulod siya sa bus ni Carter kag ginhatagan sang “VIP juice”.
Matapos sini, gindala siya sa “bathroom” sang bus, kag ginpa “perform” sang “oral sex”.
Ginsaysay pa gid sang babaye nga gindala siya sa katre sang singer kag ginhimuslan.
Ang biktima ginkilala nga si Shannon Ruth, nga karon 39-anyos na.
Ginpalayag sang abogado ni Ruth nga nagluntad ang pagpang abuso ni Carter sa biktima sang tuig 2001 sa diin naga edad pa lamang sang 17 anyos ang babaye.
Sadto nga ti-on, naghingyo sang “autograph” si Ruth kay Carter, matapos nga nagpatigayon sang show ang Backstreet boys sa Tacoma, Washington.
Dugang pa sang abogado, “virgin” pa sadto nga ti-on ang biktima nga si Ruth nga nagahilibi-on samtang gina-abuso, apang ginpadayon ni Carter ang kremin.
Matapos sang insidente, nagpaandam si Ruth kay Carter nga isugid sa publiko ang ginhimo sang singer, apang ginsakit siya kag ginsinggitan ni Carter.
Gintawag pa ni Carter si Ruth nga “retarded”, gani wala sang mapati sa anuman nga ihambal sang biktima.
Sa isa ka press conference, ginsaysay sang biktima ang insidente.
Wala pa sang statement nga gin release ang kampo sang singer nga si Nick Carter, 42 anyos.
Kalakip sa mga nagsikat nga “songs” ni Nick Carter sang Backstreet boys amo ang “I Want It That Way” kag “Everybody (Backstreet’s Back)”.
Magluwas kay Ruth, tatlo pa ka mga babaye ang nagreklamo sang pagpang-abuso batuk kay Carter apang wala na ini mapamatud-an sa korte.*