BACOLOD CITY– Ginpanginbulahan ni Negros Occidental Police Provincial Office (NOCPPO), acting Provincial Director Police Colonel Leo Pamittan ang Cadiz City Police Station sa pagpanguna ni Police Lietenant Colonel Gil John Despi sa madasig nga pag-sulbar sang kaso angut sa pagpatay sang isa ka dalagita sa Barangay Cabahug, Cadiz City.
Suno kay NOCPPO Spokesperson Police Lieutenant Judesses Catalogo “very commendable” ang pagtutok ni PLTCOL. Despi sa ginpatigayon nga imbestigasyon agud madakpan ang suspek kag makakuha sang mabakod nga ebidensya angut sa krimen.
Dugang pa ni Catalogo ini ang kabahin sang Standard Operating Procedure (SOP) sang PNP nga makakuha sang madasig nga resulta sang imbestigasyon sa sulod sang 24 ka oras agud mahatag ang ginatawag nga “sweep justice” sa biktima.
Nahibaluan nga ginakabig sa karon nga “case closed” sang Cadiz PNP ang kaso ni April Cabato, 16-anyos nga dalagita nga una ginreport nga missing apang nasapwan na lamang ang bangkay sini nga nagakulob kag nagalutaw-lutaw sa isa ka suba sa Barangay Cabahug matapos nga madakpan kag mapasakaan sang kaso nga murder ang naga-isahanon nga suspek nga ginkilala kay Allan Tigbo alias “Palo”.*
