Nanindugan ang New People’s Army nga indi engkwentro ang natabo sa Sitio Ameles Brgy. Santol banwa sang Binalbagan kahapon nga adlaw kundi isa ka ‘Massacre’.
Suno kay Ka Juanito Magbanua, hungod nga ginpamatay sang mga katapo sang Philippine Army ang apat nila ka mga kaupod sa hublag.
Pahayag sini, ginatrangkaso ang ila mga kaupod kag nagpahuway sa bahin sang Sitio Kalunakon sakop man sang Brgy. Santol apang antes pa man sang natabo, ginapahayag nga gin-raid ang mga ini kag bangud madamo ang mga katapo sang 94th IB, nadesisyon sila nga indi nalang magbato rason nga natigayon ang mga ini nga madakpan.
Dugang pa ni Magbanua, gikan sa Sitio Kalunakon, gindala ang mga ini sa Sitio Ameles kag didto ginpang-masaker.
Paglab-ot sa lugar, ginsiling ni Magbanua nga nagpinalupok ang mga military agud paggwaon nga may engkwentro nga natabo.
Gindugang pa sini nga paglapas sa internasyonal nga layi sa giyera ang natabo sa diin ang mga hangaway nga yara sa ‘forcely combat status’ ukon wala sang kapasidad makig-away, indi dapat nga patyon.
Lubos naman nila nga ginapakamalaot ang ginhimo sang mga katapo sang military sa ila mga kaupod nga madakpan sang mga ini.*
by: Jinn Siatita
