Nagahilibion ang isa ka Oveseas Filipino Worker (OFW) nga iloy nga si Nelsa Salminao samtang ginapanawagan sini ang iya 21-anyos nga anak nga isa na ka semana nga na-missing.
Suno kay Nelsa nga naga-trabaho karon sa Taiwan, sang Miyerkules sang aga, Abril 19 sang may nagkadto sa iya anak nga si Rinel Delos Santos, residente sang Barangay Talaptap sa banwa sang La Castellana, nga isa ka babaye nga ginkilala kay alyas “Rona” agud rentahan ang iya motorsiklo bilang service vehicle padulong sa Barangay Aranda sa Hinigaran.
Gin-upod man ni Rinel ang iya abyan nga si Denald Mialen, 18-anyos bilang ‘convoy’ kag suno sa girlfriend ni Denald, matapos magdul-ong kay Rona, nagpadulong pa ang duha sa Barangay Bagroy sa banwa sang Binalbagan bangud may sugaton pa ang mga ini nga pasahero sa nasambit nga lugar.
Didto na wala makapauli ang duha tubtob subong kag suno kay Nelsa, may posibilidad nga gin-abduct ang iya anak kag ang abyan sini.
Dugang pa ni Nelsa, mabuot kag wala sang bisan ano nga bisyo ang iya bata mangin ang abyan sini nga si Denald.
Sang ulihi nga nakita si Rinel, ini ang nakasuksok sang ma-ong nga short, t-shirt nga puti, kag longsleeve nga gray.*
