NEGROS OCCIDENTAL– Nagalaum si Provincial Agriculturist Dr. Edmund Causing nga ma-aprubahan sang probinsya ang ginapropose sang Office of the Provincial Agriculturist (OPA) nga P15 milyones nga pondo para sa mga proyekto kag programa sang ahensya may angut sa padayon nga init ukon El Niño.
Suno kay Dr. Causing, ini nga pondo ang pagagamiton sa mga programa para sa mga mangunguma kasubong sa pag-conduct sang trainings kag paghatag sang seeds.
Ginalantaw man sang OPA ang posible nga pagpatigayon sang “Food for Work Program” apang ila pa ini ginatun-an sang maayo kun bala ini mangin epektibo nga estratehiya agud mabuligan ang mga mangunguma.
Samtang pagatutukan man sang OPA ang “information dissemination” may kaangtanan sa El Niño kag kun ano ang gilayon nga aksyon nga pagahimu-on.
Pasanyugon man sang OPA ang monitoring sang mga water sources agud mahibaluan ang mga areas nga apektado sang El Niño.
Apang ginklaro ni Causing nga sandig sa report ni Pedro Limpangog, Presidente sang Federation of Irrigators Association Central Negros- Bago River Irrigation System (FIACN – BRIS) wala pa sang problema ang suplay sang tubig nagikan sa mga dam rason nga wala pa sang na-report nga irrigation shut down.
Sang tinalikdan nga Abril 21, 2023 nagtambong si Dr. Causing sa kick-off sang Rice Comprehensive Enhacement Fund (RCEF)- Seeds Distribution ukon pagpanagtag sang libre nga binhi sa DA sa banwa sang San Enrique, Negros Occidental.
Samtang bukas naman si Dr. Causing sa suhestiyon ni 5th District Congressman Atty. Dino Yulo nga magapatigayon sang cloud seeding sa probinsya.*
