Nakibot ang station officer sang Ninja Van Escalante Branch matapos sini makit-an nga nakabukas na ang roll-up door sang ila opisina sadtong Abril 21, las 7:00 sang aga.
Matapos ang pagpangusisa, natukiban nga nabuksan ang vault kag wala na ang ila koleksyon nga kapin P203,888.
Gina-alegar sang station officer nga si Cristy Lape nga posible ang ila office manager nga si Glenn Comete ang may kahimuan bangud suno sa iya, siya lang ang naga-uyat sang yabi sang ila opisina kag pati sa vault.
Apang, sa pagpangusisa sang Escalante City Police Station, las 3:00 sang hapon sadtong Abril 20, ginbilin ni Glenn Cometa ang yari sa isa man ka station officer nga si Lyndi Tibar kag sa amo man nga adlaw, takna las 9:00 pasado sang gab-i, nagbalik sa opisina si Glenn agud magpadala sang iya report sa main.
Satmang, si Lyndi Tibar naman ang nagsulod sang kwarta sa vault kag ginbutang ang yabi sa laptop bag sang opisina kag naglakat.
Pagkasunod nga adlaw, didto na natukiban ni Cristy Lape nga bukas na ang ila opisina kag wala na ang ila koleksyon sa vault.
Boluntaryo naman nga nagpadulong ang manager nga si Cometa sa Police Station agud i-klarohon kag ginpanginwala ang alegasyon batok sa iya.
Nagpangayo naman sang bulig ang Escalante City Police sa mga eksperto sa SOCO-Provincial Office agud mahibaluan kag makilala ang posible suspek sa natabo nga pagpangawat.
