Nakumpiskar ang isa ka balikbayan box nga may unod sang gina-alegar kush ukon high grade marijuana nga nagabalor sang P16.8 million sa Pair Cargo Warehouse sa Pasay City.
Nadakpan sang Bureau of Customs (BOC) Philippine Drug Enforcement Agency (PDEA) kag NAIA Inter-Agency Drug Interdiction Task Group (NAIA-IADITG) ang consignee sa joint controlled delivery operations sang Sabado sa Antipolo, Rizal.
Nag-abot ang subject parcel sa NAIA pinaagi sang balikbayan box kag gindeklarar nga personal effects halin sa California, USA.
Apang sang ginpaidalum ini sa x-ray screening kag physical examination, didto natukiban nga ang box ang may unod nga 12,000 gramos sang dried leaves sang marijuana.
Gina-imbestigaran karon ang duha ka consignee para sa initiation sang corresponding inquest proceedings para sa paglapas sa RA 9165 ukon Comprehensive Dangerous Drugs Act of 2002 kag RA 10863 ukon Customs Modernization Act (CMTA).*