Isa ka 17-anyos nga solterito ang nagpakigbahin sang iya istorya kun paano ini nakaluwas sa sulod sang 94 ka oras ukon malapit apat ka adlaw nga natampukan ini sang magluntad ang linog sa Turkey.
Suno kay Adnan Muhammet Korkut sa interview sang ABC News, nagakatulog ini sa ila puluy-an sang magluntad ang linog kag gilayon ini nga nagplastar sa “fetal position”.
Ginpahayag pa ni Korkut nga sang natampukan ini, gin-inom sini ang iya kaugalingon nga ihi kag ginkaon niya man ang ila mga bulak agud makaluwas.
Ginapa-alarm man sini ang iya phone kada 25 minutos agud indi ini matulugan apang naubusan ini sang battery pagkatapos sang duha ka adlaw.
Sang ginapatigayon ang rescue operation, nagakabalaka ang solterito nga indi ini mabatian sang rescuers.
Apang pagkatapos sang apat ka adlaw, tigayon nga nasalbar ini.
“Thank you to the people who came and saved me,” pasalamat ni Korkut.
