BAGO, NEGROS OCCIDENTAL– Gina-imbestigaran na sang Provincial Legal Office (PLO) ang pagkadula sang 789 ka mga bags sang abono nga nagabalor sang P2.7 milyones sa sulod sang Rice Processing Center (RPC) Warehouse nga nahamtang sa Barangay Tabunan sa siudad sang Bago, Negros Occidental.
Suno kay Provincial Legal Officer Atty. Alberto Nellas, natukiban nga nadula ang nasambit nga mga abono sang nagligad nga tuig sang Oktubre 2022 sandig sa incident report nga gin-sumiter sang Office of the Provincial Agriculturist (OPA) kag Security and Safety Division (SSD) sa PLO.
Ginpahayag ni Atty. Nellas nga gina-usisa na nila karon ang nasambit nga report kalakip na ang mga personnel kag security personnel nga natalana sa nasambit nga warehouse para sa pag-isyu sang “Show Cause Order”.
Dugang pa ni Atty. Nellas sandig sa report sang OPA kag SSD natukiban ang pagkadula sang mga abono sang nagpadulong sa RPC warehouse ang mga personnel sang Local Government Unit (LGU) sang Cauayan agud kuhaon ang mga abono nga gin-alokar sa ila.
Suno kay Nellas, ang mga nasambit nga abono ang gikan sa Department of Agriculture (DA) nga ginhatag sa provincial government agud ipanghatag sa nagkalain-lain nga mga LGUs.
Ginalantaw karon sang PLO ang anggulo nga “inside job” bangud sandig sa report sang OPA wala sang may nakita nga “forcible entry” ukon patima-an nga gin-ransak ang bodega.
Ginkumpirmar man ni Atty. Nellas nga may lima ka mga empleyado ang natalana sa nasambit nga bodega nga ginalakipan sang duha ka personnel sang OPA kag tatlo ka security personnel.
Sa karon ang lima ka mga personnel ang gin-saylo na sa lain nga opisina matapos sa ginpatigayon nga fact-finding.
Sa bahin sang mga imbolbado nga mga security personnel, ginahibalo pa sang PLO kun ini ang mga tinawo sang Security and Safety Office sang probinsya ukon mga personnel sang isa ka security agency.
Samtang wala naman ginpatpat pa ni Atty. Nellas kun nga-a subong lang ginpatigayon ang imbestigasyon apisar nga na-diskubrehan ang pagkadula sang mga abono sadto pang tinalikdan pa nga tuig.
Nahibalu-an nga ang Rice Processing Center ang ginapanag-iyahan sang provincial government nga ginbuksan sadtong Abril 2015 nga nagabalor sang P64 milyones.
Ginpatindog ang pasilidad agud mabuligan ang mga mangunguma nga mag-sanyog ang ila produksyon bilang kabahin sa Food Security nga programa sang probinsya.*
