Ginpahayag ni IBP – Negros Occidental Chapter President Atty. Gerry Llena nga magluwas sa “qualified theft”, posible man nga magapangatubang sa kaso nga “economic sabotage” sa idalom sang Republic Act 10845 ang mga driver, mastermind kag mga kakunsabo sa pagdiskarga kag pagpangawat sang 1,000 ka mga sako sa siudad sang Bago.
Suno kay Atty. Llena sandig sa nasambit nga layi, ang krimen nga large-scale agricultural smuggling ang ginakabig nga economic sabotage kun ang ginkawat nga kalamay, mais, poultry, ahos, bombay, carrots, isda kag mga utan ang indi maganubo sa P1 million.
Sa kaso sa “Hijack Me” sa siudad sang La Carlota nga nagdangat sa 1,000 ka sako sang kalamay ang gin-attempt nga kawaton kun sa diin ini ang nagabalor sang halos P3 million kag sandig sa bidding price, nakasulod ini sa kaso nga economic sabotage.
Dugang pa ni Atty. Llena nga bangud man sa kadako sang kantidad sang imbolbado nga kalamay, posible nga masulod man ini sa non- bailable nga kategoriya sang qualified theft nga ginpasaka nga kaso batok sa mga akusado.
Madumduman nga Martes sang aga, Setyembre 26, 2023 sang gindeklarar nanday Jhujiet Arsenio nga taga-Potatan, Iloilo kag Michael Orquin nga taga-siyudad sang Cadiz, lunsay mga driver sang HMP Trucking Services, nga gin-hijack ang ila duha ka ginnamaneho nga wing van nga may unod nga tig-500 ka sako sang kalamay sa bahin sang La Carlota City, pasado las 8 sang gab-i sadtong Lunes, Setyembre 25.
Sandig sa pahayag sang duha ka driver, ginbaklid, gin-blindfold kag ginbilin sila sa sulod sang wing van nga ginpark sa higad sang dalan sa Purok Wawa, Barangay Pandanon Silos, Murcia, Negros Occidental.
Apang sa joint follow up operation sang Murcia Municipal Police Station, La Carlota City Police Station, Bago City Police Station kag Intel Operatives sang Negros Occidental Police Provincial Office (NOCPPO), natukiban nga nagabutig ang duha ka driver kag nagahimo-himo lamang sang istorya kag nahibaluan nga wala sang hijacking incident nga natabo kundi ‘inside job’ sang duha ka driver kag mga ka kakunsabo sang mga ini.
Na-trace sang kapulisan ang mga kalamay sa abandonado nga bodega sang Negros Kabisig Livelihood Cooperative nga nahamtang sa Purok Malipayon, Barangay Busay, Bago City.
Gilayon man nga ginkarga liwat sa wing van ang mga kalamay kag gindala sa Bago City PNP bilang mga ebidensya. Samtang ang duha ka mga driver nga una nga nagreklamo sa Murcia PNP ang ginakabig na sang kapulisan nga mga suspek.
Ginsaylo na sang Bago City Police Station gikan sa Murcia PNP ang imbestigasyon sang kaso kag paghimo sang nagakaigo nga tikang, kalakip na ang pagpasaka sang kaso batuk sang mga akusado.
Detinado na karon sa Bago City Police Station ang duha ka mga driver sang Wing Van. Samtang nagapadayon pa ang imbestigasyon sang kapulisan angut sa nasambit nga kaso.
