Gindagsa sang mga manugbakal ang una nga adlaw sang Negros Trade Fair (NTF) nga ginhiwat sa Glorietta Activity Center sa siudad sang Makati kun sa diin ginpresentar ang lokal nga mga produkto gikan sa Negros Occidental angut sa ika-37 nga provincial trade fair sa Makati.
Setyembre 26 ginpatigayon ang ribbon-cutting rites kag blessing sang 108 ka mga booths nga nagabaligya sang pagkaon, bags, bayo, mga gamit sa sulod sang balay kag iban pa nga himo sang Negros Micro, Small kag Medium Enterprises (MSMEs) sa Oriental kag Occidental kun sa diin nangin bisita man sanday Defense Secretary Gilbert Teodoro, Senators Imee Marcos, Cynthia Villar kag Grace Poe, Makati Vice Mayor Monique Lagdameo, Gretchen Conjuangco kag madamo pa.
Ang nasambit nga programa sa Glrorieta 2 ang ginpangunahan ni Governor Eugenio Jose Lacson kaupod nanday NTF Chairperson Michael Claparols kag Association of Negros Occidental Producers (ANP) President Arlene Infante.
Sa pahayag ni Lacson, sa una nga adlaw sang NTF nagdangat gilayon sa 7.2 Million pesos ang nalab-ot nga sales sa mga entrepreneurs nga ginalauman pa nga madugangan asta sa Oktobre 1 nga mangin ulihi nga adlaw sang trade fair kag gina-target nga malapawan ang nagligad nga sales nga naglab-ot sa kapin 39 Milyones pesos.
Suno pa sa Gobernador nga pinaagi sini nga aktibidad, ma-inspire ang mga Pilipino nga magbakal sang mga locally-made products nga world class ang kalidad kun sa diin mangin dako na nga bulig sa mga taga probinsya nga nagahimo sang produkto.
Ang sini nga tuig nga Trade Fair sang probinsya ang may tema nga “Amuma” buot silingon ang pagtatap nga naga selebrar sang wala katupong nga generosity, mainit nga pagbaton kag mapinalanggaon kun sa diin ini ang nagalarawgay sang mga pumuluyo sang Negros Occidental.
Suno naman sa Chairperson sang ANP nga sang matukod ini sang tuig 1985, ang NTF ang nagserbe nga taytay para mabuligan ang mga magagmay nga mga entrepreneurs sa Negros Occidental sa pagsugod sang ila nga negosyo kag mapadayon sa mga masunod pa nga mga tinuig.*
