Desidido nga magapasaka sang kaso ang mga kabataan ni Manuel Chan Sr. ukon Tatay Noli batuk sa driver sang Tri – Vehicle nga nag “hit and run” sang ila amay nga nagresulta sang hinali nga kamatayon sini.
Sa interview sang Radyo Bandera kay Cris John Chan, bata sang biktima hulaton lang nila nga malubong ang ila amay buwas nga adlaw, Setyembre 18, 2023 antes nila asikasuhon ang pagpasaka sang kaso batuk kay Arnold Perocho, residente sang Purok Pinetree, Barangay Bata, Bacolod City.
Suno kay Chris John nga naga-istar kag didto na nagkapamilya sa Maynila, tuman ka sakit sa iya nga balatyagon nga bangkay na lamang sang maabtan niyab ang iya amay nga wala niya nakita sa sulod sang 17 ka tuig.
Dugang pa ni Chris John, kaakig ang iya nabatyagan sang iya makita ang mga video nga nagahigda sa karsada ang iya amay nga nagasuka sang dugo kag nagadugo pa sa dalunggan sini.
Palayag ni Chris John nga bisan magluhod pa sa iya atubangan si Perocho, indi niya ini mapatawad sa pagka-iresponsable sini nga pagmaneho sang salakyan nga nagresulta sang hinali nga kamatayon sang iya amay.
Luyag sang pamilya nga mahatagan sang hustisya ang kamatayon ni Tatay Noli kag mahatagan man sang leksyon ang ginhimo sang drayber
Madumduman nga nabungguan si Manuel samtang nagabisikleta sa Circumferetial Road malapit sa taytay sa Barangay Montevista, siudad sang Bacolod sadtong Setyembre 7, 2023.
Suno kay Chris John, gin-ako sang suspek nga siya ang nakabunggo sa iya amay kun sa diin nagpundo pa ini sang makita nga natumba si Tatay Noli apang bangud sang iya kahadlok nga makastiguhan sang mga tawo, nagpalagyo ini.
Konsensya naman ang nagtulod sang suspek agud magsungka sa kapulisan.
Sa interview sang Radyo Bandera kay PCPT. Francis Depasucat, kaso nga Reckless Imprudence Resulting to Homicide ang pagaatubangon nga kaso ni Perocho.
