Ginbawian sang kabuhi ang isa ka panday matapos ginluthang-patay sang tatlo ka gina-alegar miembro sang New People’s Army (NPA) sa Sitio Mag-ubay, Brgy. Mani-ak, siudad sang Guihulngan, Negros Oriental pasado lang 7 sang aga sini nga Martes, Abril 11, 2023.
Ginkilala ang biktima kay Armando Babor, 33-anyos, kasado, kag residente sang nasambit nga lugar.
Suno sa report sang kapulisan, nagapamahaw si Armando kaupod ang iya asawa nga si Archel Caballero Babor sang hinali na lamang gintawag sang tatlo ka armado nga lalaki ang biktima kag gilayon ini nga ginluthang.
Bangud diri, nakaagom sang igo sang bala sa ulo kag nawala nga bukton ang bikitma nga gintunaan sang iya kamatayon.
Matapos ang pagpangluthang, hinali nga nagpalagyo ang mga suspek padulong sa nabukid nga bahin sang Barangay Calupaan sa nasambit nga siudad.
Narekober naman ang tatlo ka basiyo sang 5.56mm sa ginluntaran sang insidente.
Nakig-angut na ang mga kapulisan sa mga katapo sang intel sang 62nd Infantry Brigade sang Philippine Army kag iban pa nga intel communities para sa case build-up.*
