Patay ang isa ka panday matapos ini ang ginhatok-hatok sang buno sa Sitio Tarukan, Barangay Salong, ciudad sang Kabankalan, Negros Occidental, takna las 8:20 kaina sang aga, Huwebes, Pebrero 9, 2023.
Wasak ang tyan sang biktima nga si Rodrigo Osorio, 58-anyos, nga isa ka panday sang mga binangon kag iban pa nga gamit.
Sandig sa imbestigasyon, nagpadulong sa balay ni Osorio ang suspek nga ginkilala kay Rene Germosa, 33-anyos kag ginpangita si Jessie Osorio, ang bata sang biktima.
Wala sa lugar si Jessie sang pagpadulong ni Germosa.
Naglalisay ang biktima kag ang suspek kag ginbuno ni Germosa si Osorio sa tyan kag ginbitbit pa ang kasudlan sini tabok sa dalan, antis ini nadakpan sang mga tanod.
Double-bladed nga kutsilyo ang gingamit ni Germosa sa pagbuno kay Osorio. Ginturn-over naman sang tanod ang kutsilyo sa kapulisan.
Daan nga tema-tema ang ginalantaw sang kapulisan nga motibo sa insidente. Posible nga wala naga-intyendihanay si Germosa kag si Jessie nga updanay man sa inuman.
Nahibaluan nga si Osorio ang tiyo pa sang asawa ni Germosa.
Yara karon ang bangkay ni Osorio sa Sola Gracia Funeral Services, samtang nakahunong naman sa custodial facility sang Kabankalan Police Station si Germosa.
Sarang nga mapasakaan sang kaso nga homicide si Germosa.*