Nag surrender kag nagatiner na sa prisohan ang pari nga naka assign sa probinsya sang Cagayan, matapos nga ginpa aresto sang korte, bangud sa kaso nga paghimulos.
Sang tinalikdan nga tuig nag isyu sang warrant of arrest ang korte batuk sa pari, apang nakapiyansa ini sang P186,000 para sa iya temporaryo nga kahilwayan.
Kalakip sa mga kaso nga ginapangatubang sang suspek amo ang 20 counts sang acts of lasciviousness, voyeurism kag rape.
Sang Oktubre tuig 2022, ginsaysay ni NBI Director Arcelito Albao, nga nagdihon sang team ang NBI officers agud masundan ang pari kag ang biktima sa isa ka “meeting place”.
Sa nasambit nga lugar, ginpilit sang pari ang 16 anyos nga dalagita, nga magpakighilawas , kalakip ang pagpamahog nga ipakita sa publiko ang hublas nga larawan kag videos sang biktima.
Suno sa dalagita, gin “seduce” siya kag pwersa nga ginkuhaan sang litrato nga wala sang panapton.
Sini nga tuig, liwat nga nag isyu sang warrant of arrest si Judge Dennis Mendoza sang Regional Trial Court Branch 4, Tuguegarao City kag wala na ginpahanugutan ang suspek nga makapiyansa.
Ginhingadlan sang mga otoridad ang akusado bilang si Fr. Karole Reward Israel, assistant parish priest sang Saint Vincent Ferrer Parish sa Solana, Cagayan.
Detenado na si Fr. Israel sa Cagayan Provincial Jail.*
