Ginalantaw sang mga katapo sang Bacolod Police Station 10 nga personal grudge ang motibo sa pagluthang-patay kay Joseph Jocson nga anay priso kag drug surrenderer sa Block 7, Prk. Narra Phase 4, Brgy. Handumanan sa Bacolod City.
Suno kay Police Major Richard Fajarito, hepe sang Police Station 10, posible nga ginhingabot ang biktima bangud sa iya nagliligad pa nga mga atraso.
Pahayag sang hepe, nakaagi priso si Jocson sa kaso nga robbery ukon pagpanaka-saka sang mga kabalayan sa area sang Police Station 4 kag nakalab-ot na ini sa Muntinlupa.
Sa Handumanan, nagalibod ini sang karne bangud malapit lamang sa slaughter house ang ila nga gina-istaran.
Nahibaluan nga nagainom-inom ang biktima kag ang upod sini sang gab-i sang nagluntad ang insidente.
Bangud nga kulang ang ila ilimnon, naglakat ang mga ini agud nga mangita sang pwede mabaklan.
Ginpahayag ni Fajarito nga ginsundan si Jocson sang suspek kag paglab-ot sa madulom nga bahin sang lugar, didto ini ginluthang sang makaisa ka beses nga nag-igo sa iya nga ulo nga amo man ang gintunaan sang iya gilayon nga kamatayon.
Narekober naman sa lugar ang empty shell sang kalibre .45 nga pusil.
Sa karon nagapadayon pa ang imbestigasyon sang kapulisan sa pagtumod sa responsible sang krimen.*
by Jinn Siatita
