BACOLOD CITY – Ginpahayag sang commander sang 303rd Infantry Brigade nga indi pa sa karon mapat-ud sang ila ground commander nga ‘clear’ ukon hilway na sa presensya sang New People’s Army (NPA) ang Barangay Carabalan sa siudad sang Himamaylan., Negros Occidental.
Sa interview sang Radyo Bandera Bacolod kay Brigadier General Inocencio Pasaporte, ginpahayag sini nga alang-alang pa nga makabalik sa ila nga puluy-an ang mga apektado nga residente nga nag-evacuate bangud sa nagluntad nga engkwentro.
Suno sa iya, nagsipak na sa magagmay nga grupo ang mga rebelde kag nagapadayon pa ang ila operasyon.
“As of now no, indi pa ma-completely assure ka ground commander naton didto, as of now alang-alang pa, daw ara pa ang iban nga small group, nag-spread sila into small groups,” pahayag ni Pasaporte.
Nagapangayo naman sang dispensa ang commander, apang suno sa iya indi nila matugutan nga magbalik ang mga residente kag marisgo pa ang kabuhi sang mga ini bangud sa natabo.
Nahibaluan nga yara na sa lima ka adlaw ang tensyon nga nagaluntad sa nasambit nga siudad.*
