Ginpahayag ni Provincial Legal Officer Atty. Alberto Nellas Jr nga posible iga-sumiter na nila sa talatapan ni Governor Eugenio Jose Lacson sa maabot nga Marso 28 ang ila pormal nga investigation report angut sa kaso ni anay Isabela Acting Municipal Treasurer Nenette Escarda bangud sang pagkadula sa pondo sang banwa nga nagabalor sang P6.8 milyones.
Suno kay Nellas, naka sumiter na sang iya position paper si Escarda sang tinalikdan nga Marso 13 angut sa kasong administratibo nga Grave Misconduct, Serious Dishonesty kag Malversation of Public Funds nga ginpasaka batok sa iya.
Dugang pa ni Nellas posible nga makapaguwa na sila sang resolusyon sang kaso matapos ang 30 ka adlaw nga deliberasyon sandig sa mga ginpresentar nga mga ebidensiya.
Kung mapamatud-an nga guilty sa alegasyonk magapangatubang si Escarda sang penalidad nga dismissal sa serbisyo, perpetual disqualification from holding public office kag forfeiture of benefits.
Sa karon, ginpaidalom pa si Escarda sa 60 ka adlaw nga preventive suspension.
Madumdoman nga ginpasakaan sang reklamo si Escarda bangud sa pagdala sang kwarta sang banwa sa Isabela sa iya puluy-an sa Las Palmas Subdivision, Barangay Taculing, Bacolod City nga wala sang pahanugot gikan sa Municipal Official.
Natukiban na lamang ang ginhimo sini matapos nga iya ginpa record sa Police Station 6 sadtong bulan sang Enero nga ginsulod sang wala makilal-an nga persona ang ila puluy-an kag gintaban ang cash nga nagabalor sang P2.6 milyones kag tseke nga nagabalor sang P3.8 milyones.*
