NEGROS OCCIDENTAL– Sandig sa monintoring sang Provincial Veterinary Office (PVO) nagapabilin nga stable ang presyo sang karne sang baboy sa probinsya kumparar sa Luzon.
Suno kay Provincial Veterinarian Dra. Placeda Lemana, ginpanigurado sang provincial government nga indi magataas ang presyo sang karne sang baboy sa merkado.
Dugang pa ni Lemana, ang pinakamahal nga presyo sang baboy sa merkado ang nagadangat lamang sa P300 kada kilo samtang ang pinakabarato ang yara naman sa P255 kada kilo.
Pahayag ni Lemana nga sa karon naga-average lamang ang presyo sang karne sang baboy sa Negros Occidental sang P280 kada kilo mas manubo kumparar sa tig-P400 kada kilo sa Luzon.
Nagapadayon naman ang produksyon sa probinsya sang baboy bangud sa mga ginapanagtag sang provincial government pinaagi kay Governor Eugenio Jose Lacson nga replacement kit kag mga idik.
May pagnubo man sa produksiyon sang baboy sang nagligad nga tuig bangud sa epekto ni Bagyong Odette apang sa bulig sang Department of Agriculture (DA) nagpaguwa sang pondo ang probinsya agud mabuligan ang sektor sang mga hog raisers.*
