NEGROS OCCIDENTAL– Ginkumpirmar sang Provincial Veterinary Office (PVO) nga nagnubo ang bilang sang mga buhi nga baboy nga na-ship out sang probinsya kumparar sang tinalikdan nga tuig.
Sandig sa datus sang PVO, humalin sa bulan sang Enero tubtob bulan sang Marso, naka-ship out lamang ang probinsya sang 11,099 ka bilog nga buhi nga baboy.
Suno kay Dra. Placeda Lemana, nagnubo sang 2 mil tubtob 3 mil ka bilog ang na-ship out sang probinsya kada bulan.
Apang ginpahayag ni Dra. Lemana nga ang iban nga mga buhi nga baboy nga wala ma-ship out ang gina-process sang mga hog raisers agud makabawi ang mga ini.
Dugang ni Lemana ini bangud wala pa nagapahanugot ang Negros Occidental nga magapasulod sang mga pork processed products gikan sa Panay kag probinsya sang Cebu.
Samtang ginpahayag ni Lemana nga sang nagligad nga bulan naka-ship out pa ang probinsya sang kabilugan nga 4,031 nga buhi nga baboy apisar nga nagapatuman sang banning ang Cebu sang mga pork products gikan sa isla sang Negros.*
