Ginpahayag ni Sir Rodito Badian, Principal sang Doña Montserrat Lopez Memorial High School, nga wala sila nagkulang sang paandam sa mga student-athletes sang Regional State Colleges and Universities Athletics Association (RSCUAA) Meet 2023 nga indi “potable” ukon indi dapat pag-imnon ang tubig sa mga dug well sang buluthuan.
Base sa interview sang Radyo Bandera kay Sir Badian, bangud sa kadamuon sang atleta, naghingyo ang RSCUAA sa superintended sang Silay nga mangin billeting school ang Doña Montserrat Lopez Memorial High School sang pila ka teams sang RSCUAA Meet nga ginpatigayon sang Setyembre 10-16, 2023.
Gilayon naman ini nga gin-aprubahan kag didto nagtiner ang pito ka mga universities kag state colleges kun sa diin ang masobra 20 ka mga atleta ang nakabatyag sang acute gastroenteritis ukon tuman nga paglupot bangud sa mahigko nga tubig sang billeting school.
Suno pa kay Sir Badian, may yara sang anom ka bubon ang ila buluthuan kag may pressure tank ang mga ini nga amo ang nagasuyop sa tubig kag magasuplay sa mga gripo.
Wala ginagamit sa pagpaligo, pag-inom kag pagpreparar sang pagkaon ang tubig sa bubon. Ginagamit lamang ini sa pagbunyag sa mga tanom.
Dugang pa ni Sir Badian nga wala sila nagkulang sang pagpahibalo nga indi pwede gamiton ang tubig sa mga bubon bangud antes pa ang event, may pila ka mga teams ang nag-advance party upod ang ila tagsa ka mga sports coordinator, incharge sa kusina, kag facilitators kag nagpatigayon sang inspeksyon kun sa diin namangkot pa ang mga ini kun pwede gamiton ang tubig sa bubon.
Pahayag pa sang school principal nga may yara sila sang matinlo nga tubig nga ginagamit kag ini ang nagahalin sa Silay City District. Nagasuplay man sila sang mineral water nga pwede gamiton sang mga student-athlete sa pag-inom kag pagpreparar sang pagkaon.
Nagapati man ang school principal nga “isolated case” lamang ang paglain sang pamatyag sang masobra 20 ka student-athletes sang West Visayas State University kun diin nahibaluan nga may severe diarrhea ang iban.*
