Patay ang isa ka tricycle driver matapos ini makabunggo sa kasugata nga canter truck sa National Road, Sito Puting Tubig, Barangay Daga, siudad sang Cadiz, takna las 11:30 sang gab-i, Martes, Setyembre 19, 2023.
Ginkilala ang napatay nga tricycle driver kay Rogelio Ore Jr., residente sang Brgy. Bonifacio, Cadiz City.
Samtang, ang nagamaneho sang canter truck ang ginkilala kay Rolando Sapa y Casipong kag ang iya pasahero ang ginkilala kay Mila Española and Carlos Meguel Gallego, lunsay mga residente sang Brgy. Minapasok, banwa sang Calatrava.
Base sa report sang Cadiz City Police Station, halin sa Cadiz proper ang tricycle kag nagapadulong sa Brgy. Caduha-an sang nasugata sini ang canter truck nga yara sa pihak nga linya sang karsada.
Nagbungguanay ang duha ka salakyan kag nagdiretso ang mga ini sa kalog nga yara sa kilid sang dalan.
Nakaangkon ang duha ka drivers kag isa ka pasahero sang madamo nga injuries sa nagkalain-lain nga bahin sang ila lawas.
Gilayon naman nga gindala sa lapit nga ospital ang mga imboldado sa aksidente agud mahatagan sang medikal nga atensyon apang gindeklarar nga dead on arrival si Ore sang attending physician.
Ginahulat naman sang mga kapulisan ang desisyon sang pamilya sang biktima kun magapasaka ini sang kaso batuk sa driver sang canter truck.*
